Дагэтуль бясьпекаю Ціханоўскай займалася літоўская Служба аховы кіраўніцтва. Пра намер зьнізіць узровень аховы Ціханоўскай і яе працоўных памяшканьняў ўлады Літвы абвясьцілі ў кастрычніку.
Як адзначае BNS, ініцыятары гэтага рашэньня сьцьвярджаюць, што зьмена ўзроўню аховы Ціханоўскай зьвязана са спадам патоку пагрозаў у яе адрас, а таксама з тэхнічнымі прычынамі.
Шэраг літоўскіх палітыкаў скрытыкавалі гэтае рашэньне, назваўшы яго не тэхнічным, а палітычным.
17 кастрычніка стала вядома, што літоўскія ўлады часова вярнулі Ціханоўскай ахову — пакуль не будзе сфармаваная новая сыстэма бясьпекі.
Крыніцы Свабоды, у тым ліку з атачэньня Ціханоўскай, паведамлялі на ўмовах ананімнасьці, што Ціханоўская і прынамсі частка ейнага офісу плянуюць пераезд зь Вільні ў Варшаву.
Дарадца Сьвятланы Ціханоўскай Дзяніс Кучынскі 10 сьнежня ня даў адназначнага адказу на пытаньне Свабоды пра пераезд Офісу Ціханоўскай.
«Мы ўсё яшчэ чакаем фінальнай схемы, сыстэмы аховы, якая мусіць быць забясьпечана [Сьвятлане Ціханоўскай] у Літве, — пракамэнтаваў тады сытуацыю Дзяніс Кучынскі. — На гэты момант Сьвятлана знаходзіцца пад апекай Літвы, дзяржаўнай службы аховы. Толькі пасьля таго, як атрымаем фінальнае рашэньне ад Літвы, мы прааналізуем прапанову і будзем вырашаць, як дзейнічаць».
Дзяніс Кучынскі кажа, што яны «хацелі б застацца і далей працаваць у Вільні», але «яшчэ некалькі месяцаў таму, калі гэтая сытуацыя зьявілася, мы пачалі разглядаць розныя варыянты». Паводле яго, сёньня «даты пераезду ці там нейкага пляну» няма.
Сьвятлана Ціханоўская жыве ў Вільні з 11 жніўня 2020 году, куды пераехала пасьля ўдзелу ў прэзыдэнцкіх выбарах пад ціскам і пагрозамі ёй і яе дзецям. У сталіцы Літвы сфармаваўся Офіс Сьвятланы Ціханоўскай, які стаў цэнтрам палітычнай дзейнасьці дэмакратычных сілаў Беларусі.
Літоўская дзяржава падтрымлівае дэмакратычныя сілы Беларусі, у тым ліку пасьля 2020 году. Але апошнім часам некаторыя палітыкі пачалі крытыкаваць тое, што Сьвятлана Ціханоўская мела высокі статус аховы з боку літоўскай Службы аховы кіраўніцтва і нібыта гэта задорага каштавала дзяржаўнаму бюджэту.
